තොප්පි වෙළෙන්දාගේ කවිය
එන්න මහතුනේ ගන්න
හොඳ ලස්සන තොප්පි මෙන්න
රතු නිල් කොළ විතරද නොව
ඔබට අවැසි පාට මෙන්න
ඔබ කැමැති සුදු පාටද
මෙන්න සුදුපාට වැඩියෙන්ම විකිණෙන
බලන්න මේ අඳුරු
කළුපාට එකේද ලස්සන
එන්න මහතුනේ ගන්න
හොඳ ලස්සන තොප්පි මෙන්න
ඇයි මහතුනේ ඔබ ඔය
ඇඳගෙන පරණ තොප්පිම
දුප්පත්කම නිසාව ද
ආස නැතිවද අලුත් ඒවට
පළඳා බලන්න මේ සැම
අපි දෙනවා ලාබෙට
බලන්න මේවායේ මෝස්තර
දම්සක් කුරිස අඩසඳ
ඈ නෙක් රටා දෑ දද
තෝරාගන්න රිසි එක
පළඳා බලා ඔබ'තින්ම රිසියෙන
එන්න මහතුනේ ගන්න
ගත්තෙ නැතත් බලල යන්න
අණ්ඩය දදා පළඳින
දුවිලි ගසා ඔපලන
මහතුනේ කිම අරුමය
කල් ගිය තොප්පි පළඳින
එල්ලුවද නිතියෙන
මහගෙදර පුදසුන ළඟ
සඳුන් කපුරෙන් නොයන
කළු දුඹුටු ගඳම වැගිරෙන
ගලවන්න පරණ ඔය සැම
අපි දෙනවා ලාබෙට
නැතිය වෙන කොහෙවත්ම ගන්නට
එන්න මහතුනේ බලන්න
හොඳ ලස්සන තොප්පි මෙන්න
ඉහළින් අනුමැතිය ලබපු
ගාර්මන්ට්වල හදපු ඒවා
කිහිප දෙනෙක් හැඩ කරපුවා
පිටරටිනුද ගෙනා ඒවා
හැකිය ගන්න අපෙන් මෙන්න
පැලැස්තර නොම සැඟවුණ
පැල්ලම් ද ඉල්පී එන
ආඩම්බර හදින
උරුමෙක මහිම කියමින
ගලවන්න ඔය සැම
තාලයට අලුත්ම නිම කළ
පළඳා බලා මේ හැම
එන්න මහතුනේ බලන්න
හොඳ ලස්සන තොප්පි මෙන්න
අව්වට ද පළඳින
වැස්සට ද හිස ලන
හිස් තට්ට ද වසන
ඔබෙ උජාරුව ද පෙන්නන
තොප්පි තියෙනවා අපි ළඟ
අපි දෙනවා ලාබෙට
බලන්න නෑ ගන්නේ මිළ
බලල යන්න එන්න මෙන්න
- ප්‍රසාද්
No comments:
Post a Comment