යකඩ මිරිවැඩි සඟල තුනකුත්
යකඩ හැරමිටි තුනක් වෙනකුත්
යකඩ හිස්වැසුමන්ම තුනකුත්
ගෙවෙන තුරු එකලාව ඇවිදින
මුහුදු හතකට එහා
දේශ හතකින් එපිට
මංමුළා පෙම්වතා
කෝ කොයිද විමසන
කවුළු දෑලේ සැඟවුණු
තියුණු පිහි තුඩු මළපුඩු
සිදුරු කළ රාජාලි පපුතුරට
කඳුළු ඔසු තවරන්න බැරිවම
සිදුරු වූ පෙම්වන්ත හදවත
ගාලා ගිය රුහිරු දැක වැළපුන
අඳුරු වන පෙතක් අස
රුදුරු ගිරි ශිඛර මත
වංකගිරි මාවත
වාරුනැතිවද දෙපා - ඔසව ඔසවා තැබුව
නුඹට හමුවිද ඉතින්
අහිමිවුණ ආදරේ පියාපත?
මූදු හතකින් එහා මාවත
හිත්ගත්ත ලංසුවල නොබැඳුන
දේශ හතකින් එහා පිරිපත
එකලාව තනි හිතින් විඳගෙන
මයා රැජිනගේ ඉනාවට
බැඳ දැම්ම සංසාර ප්‍රේමය
පාවා නොදුන්
පරමාදර්ශ පෙම්වතී නුඹ
මර්යුෂ්කා
ඔව්,
ඒ ආදරේ හුස්ම තවමමත්
එදා වාගේම දැවටිලා තියෙනවා
සුරඟන කතා පිටු වල..!
- ප්‍රසාද් නිරෝෂ බණ්ඩාර
No comments:
Post a Comment