අප මියෙන්නම අවැසිනම්

 

අප මියෙන්නම අවැසිනම්,

නොමැරෙමුය සූකරුන් විලසට.

අපකීර්තිමත් තැනෙක දඩයම් කළ,

ශාපලත් අප ඉරණමට සරදමින්

උමතු - කුසගිනි සුනඛයින් උඩුබුරන

අප මියෙන්නම අවැසිනම්

මියැදෙමුය උදාරව.

වැගිරෙනා අප රුධිරය නිෂ්ඵල නොවන්නට;

බැඳෙනු  ඇත ගෞරව කරන්නට

මියැදුනත් අප එවිට

රාක්ෂයින් අප අභියෝග කළ 

ඔහ් සහෝදරයිනි, මුහුණ දිය යුතුය පොදු සතුරාට!

සුළුතරය වුවද අප, නිර්භීතකම පෙන්විය යුතු.

ලද දහස් සතුරු පහරවල් වෙත

එක් මරණීය පරහක් දෙමු.

කිම්ද තිබුණත් විවිර වූ සොහොනක් අප ඉදිරියේ?

මිනිසුන් මෙන්, මුහුණ දෙමු  බියගුළු මිනීමරු රැළට,

බිත්තියට තදවෙමින්, මියෙමින්, නමුත් ආපසු සටන් කරලමු!  - ක්ලෝඩ් මැකේ (if we must die)  [Translated by: Prasad Nirosha Bandara]

සියක් ගැහැනු වෙති මා පෙම් කරන ( A hundred women I adore ~ Rasul Gamzatov)

සියක් ගැහැනු වෙත් මා පෙම් කරන

හැමතැනකම, ඔව් සැම විටකම සිටිති ඔවුහු.

පිබිදෙම් - නිදා වැටෙනෙම්, සිහිසුන් වෙම් - යළිත් නැගිටිම්

එනමුදු මැකිය නොහැකිමය ස්මරණ උන් ගැන.

මතකයි බොහෝ කලකට පෙර,

පාවහනකුදු නොපැළඳි ගම්බද කොල්ලෙක් 

වසත් කල එළඹිවිට මුණගැසුණුහැටි

කිසිදා මා මතකයෙන් නොමැකෙන

කුලුඳුලේ මහද මුසපත් කරපු ඒ කෙල්ල.

දිය ඌල මත නැවී හෙමි හෙමින් දියදෝන 

තම අතැ‘ති බඳුනට ද වඩ වඩා නූස් ලෙස

ඈත සිට පෙණුනාය ඈ මට.

ඈ දෙදණ හෙවූ දිය සිහිලස් ය මම දතිමි.

සිහිලස්ද? නැත!

දවා ඇත ඈ මා ගින්නෙන්

උපහාසයක් සැඟවුණ, ඒ ක්ෂණික බැල්මෙන්. 

මම ඇයට තවමමත් පෙම් කරමි.

පරෙවි අළු පැහැගත්තු කැස්පියන් වෙරළ මත 

ඉබාගාතේ ගියෙමි පසු දිනෙක

පෙම් කරපු තවත් කෙල්ලක නිසා

එනමුදු කෝල විය තට්ටුකරනට ඈ දොරට

සැරිසැරීමි එහෙයින් ඒ නිවස වටා මම්.

ඈ දිවි ගෙවූ දෙවන මහලේ

ජනෙල් මත වතුල ඈ සෙවණැල්ල දැකුමට

නැගිමි උස් වූ මේපල් තුරකට. 

තවමත්ම පෙම්කරමි මම ඒ තරුණ කෙල්ලට.

එක මැදිරියක හිඳ මොස්කව් බලා යා වුන

තව ගැහැනු ළමයෙකි, දුම්රියේ මුණගැහුණ

ආයෙමත් දකින්නට නිරන්තර හිත කියන.

ඉතිං තුති නොවී කොහොමද මුදල් අයකැමිට මම

ඈ වෙත මා අසල අසුනක් ම වෙන් කළ

ඇස් බැලුම් දල්වමින් එකිනෙකා දෙස ද

විසල් වූ භූ දැකුමන් ද විඳගමින් යන්නට!

තබා ඈ දෙපා මුල මගේ මුළු ජීවිතය

සත්තමයි, සිටියා මම ඈ සමග යන්නට.

මම තවම පෙම් කරන නපුරු කෙල්ලක් සිටියි

හැම විමට පරස්පර දේ කියයි

හැම විටම කෝපයෙන් රත් ගැහෙයි

ඔව්, ඈ මගේ කවි පවා ඉරා දැම්මා.

මම ඇයට තවමමත් පෙම් කරමි.

මා පෙම් කරන තවත් කෙල්ලක් සිටියි 

ප්‍රීතිමත් දිලිසෙන දෑස් දල්වා

සියක් වතාවක් හෝ නැතිනම් ඊටත් වැඩියෙන්

අහසක් උසට වර්ණනා කළා ඈ 

මා ලියූ කවි.

ඊර්ශ්‍යාසහගත කෙල්ලකට මම පෙම් කරන්නෙමි,

සරල ගැහැනු ළමයෙක්ටත් මම පෙම් කරන්නෙමි,

කෝලවන්තියකටත් මම පෙම් කරන්නෙමි,

සංවේදී කෙල්ලකට මම පෙම් කරන්නෙමි,

විමසුම්වන්තියකටත් මම පෙම් කරන්නෙමි,

ලෙන්ගතු කෙල්ලකට,

ඒ වගේම ප්‍රීතිමත් යුවතියකට,

මුරණ්ඩු කෙල්ලකටත් මම පෙම් කරන්නෙමි.

හැම ගමකම, හැම නගරයකම

මම ආදරේ කරන ගෑනු ළමයෙක් ඉන්නවා.

මම ගැහැනු සීයක්ට ආදරෙයි ඔව් ඇත්ත, 

නමුත් ඒ හැම කෙනෙක්ම ඔබ!

Translated by: Prasad Nirosha Bandara

* Painting : Frank Bernard Dicksee (Romeo and Juliet)

ප්‍රේමයට ඇරයුම් [Invitation To Love ~ Paul Laurence Dunbar]

ඔබ එන්න, බබළන කල්හි තරුවලින් රාත්‍රී,

නොඑසේනම් මෝදු වන විටදි සඳ.

කහ පැහැති පිදුරු පිට්ටනි මතට

හිරු තමන් රන් කිරණ ඉසින විට පැමිණෙන්න. 

මෘදු හා අළු පැහැති හවස් වරුවේ එන්න, 

රාත්‍රියේදී හෝ නැතිනම් දහවලේ ඔබ එන්න.

අහෝ ප්‍රේමය, ඔබට හැකි හැමවිටම පැමිණෙන්න

සාදරෙන් මම ඔබව පිළිගනිමි, ඔබ එන්න. 

ආදරණීය ප්‍රේමය, මිහිරියි නුඹ - ඔව් ආදරණීයයි

මෘදුයි නුඹ පරවියෙකු මෙනි කූඩු තනනා.

සම්ප්‍රාප්ත වන’යුරු කුරුල්ලකු තම කැදැල්ලට 

සපැමිණ මා හදට නිවාලනු මැනව එය.

මගේ හිත දුකින් පිරි වෙලාවක පැමිණෙන්න

එසේ නැතිනම් මසිත සතුටු වුණ වෙලාවල.

තුරුපත් පතිත වන වෙලාවක හෝ

රත් පැහැ ගැන්වෙද්දි චෙරි ඵළ ඔබ එන්න.

අවුරුද්දේ පළමුවෙන් මල් පිපෙන විට එන්න

නැතිනම් ගිමන්කල දිදුලද්දි පැමිණෙන්න.

ශීත කල පාවෙනා හිම කැටිති හා එන්න

සාදරෙන් මම ඔබව පිළිගනිමි, ඔබ එන්න.

Translated by: Prasad Nirosha Bandara

ලිලීට [To Lily ~ Alexander Pushkin]

 

ලිලී, ලිලී… මම සුසුම් හෙළමි

භග්නාශාවන්ගෙන් හා සුන් පැතුම් සහිතව

පීඩාවෙන් මිරිකී මියයමින් හිඳිනෙමි

මගේ ආත්මයේ එළිය මට අහිමි වී ඇත 

එනමුදු මගේ ප්‍රේමය නොකැඳවිය අනුකම්පාව

මා සෝචනීයයැ’යි හඟිනවා ඇත ඔබ 

ඔව්, දිගටම සිනාසෙන්න - ලස්සනයි ඔබ

අනුකම්පා විරහිතම නිමේෂයන්හිදී පවා

- Translated by: Prasad Nirosha Bandara

කිමැයි නො අසනු මැන [Don’t Ask Me Why ~ Alexander Pushkin]

 

නොඅසන්න, දුක්මුසුම කල්පනාවල මා එකලාව මන්දැයි,

මගෙ වෙහෙසකර බැල්ම සිත් කළඹවන’යුරු කිමැන්දැයි,

ජීවිතේ සිහිනය භුක්ති නොවිඳින්නේ මා ඇයිදැයි,

නිරතුරු පිරී සිටිනෙමි වියවුලෙන් - ප්‍රීතිමත්ම මොහාත් වලදී පවා.

නොඅසන්න, මගෙ සතුට වියැකුණේ මන්දැයි,

මා මුසපත් කළ ආලයට තවත් පෙම් නොකරන්නේ ඇයිදැයි,

ආදරණියකු ලෙස හැඳින්විය නොහැක තවත් මට කිසිවෙක්.

වතාවක් ප්‍රේමයක් විඳි කිසිවෙක් නොකරනු ඇතිය යළිත් පෙම්.

මොහොතක සතුට යනු සියල්ලයි ලැබෙන අප වෙත;

යෟවනයේ සිට, සමෘද්ධිමත් - ඒවගෙම කුල්මත්ම ප්‍රහසන,

ශේෂ වී ඇත උදාසීනත්වය හා ශෝකයම විතරක්.

වරක් සතුටක් ලද තැනැත්තකු එහි සාරය යළිත් නොලබනු ඇත.

* Painting: The Lovers - Rene Magritte (1928)

- Translated by: Prasad Nirosha Bandara

උමතු කෙල්ලගේ ආදර ගීතය (Mad Girl’s Love Song ~ Sylvia Plath)

 

දෑස් වසනෙමිය මම්, මුළු ලෝකයම මිය යයි;

නෙත් පියන් ඔසවමි, යළි සියලු දේ උපදී.

(මම හිතන්නේ, මගේ මනසේ ඔබ ගොඩනැගුවා මම)

තාරුකා නර්තයකය නිල් හා රක්තවන් පැහැයෙන්,

හිතුවක්කාර කළු පෑහැය කඩිනම්ම ගමනක:

මම දෑස් වසනෙමි, මුළු ලෝකයම මිය යයි.

මම සිහින මැව්වේ, මෝහනය කළයු‘රුයි යහන වෙත ඔබ මා

ප්‍රේමයෙන් සිහිවිකල විය මම, මා සිපගත්තේ ඔබ උමතුවෙන් මෙන්.

(මම හිතන්නේ, මගේ මනසේ ඔබ ගොඩනැගුවා මම)

දෙවියන් ඇද වැටේ අහසින්, නිරයේ ගිනි දළු මැකී යයි:

නික්මී යනු මැන, තුඟු දෙව්දූතයන්ගෙන් මෙනම සාතන්ගේ මිනිසුන්ගෙන්ද.

මම දෑස් වසනෙමි, මුළු ලෝකයම මිය යයි.

නිරතුරුව මම සිතුවෙ, යළිදු ඔබ එනු ඇතැ‘යි පිළිණ දුන් ලෙසින් මට,

එසේවද වියපත්ව අමතක කරමි නුඹෙ නම.

(මම හිතන්නේ, මගේ මනසේ ඔබ ගොඩනැගුවා මම)

ඔව් ඔබ වෙනුවට, අසනි කුරුල්ලෙකුට* පෙම් කළ යුතුව තිබුණා මම;

වසන්තය එළැඹෙන විට අඩුම තරමේ යළි ගුගුරන.

මම දෑස් වසනෙමි, මුළු ලෝකයම මිය යයි.

(මම හිතන්නේ, මගේ මනසේ ඔබ ගොඩනැගුවා මම)

* Thunderbird - දකුණු ඇමරිකානු පුරාවෘත්තමය පක්ෂියෙකි. ඌ තම පියාපත් ගටා ගිගිරුම් ඇති කරන බවත්, ඇස් දැල්වීමෙන් විදුලි කෙටීම ඇති කරන බවත් කියැවේ. - පරිවර්තක

[Translated by: Prasad Nirosha Bandara]

තවමමත් මතකයි ඒ පුදුම එළවන මොහොත [ I still recall the wondrous moment ~ Alexander Pushkin ]

තවමමත් මතකයි ඒ පුදුමඑළවන මොහොත:

ඔබ පෙනී සිටි විටදි මගේ දෑස් අබියස

කෙටි හා ක්ෂණික පෙර නිමිත්තක් ලෙද,

මන බඳින ආලෝකයේ සුපිරිසිදු මායාව.

දුකේදී, ගිලන් වූ විට හිත මගේ 

කලබලම වෙලාවල, තෝන්තුවා මොහොත්වල 

ඔය මුහුණෙ ලකුණු ගැන මැව්වෙමිය හීන මම

නුඹේ කට හඬ, ඔව් දැනෙනවා ඒවගෙම.

වසර ගණනක් ගෙවුණි, සැඩ සුළන් පහව ඇත

මගේ පෙර පැතුම් හා, ඒවගෙම

එදවසෙහි අහිමි විය නුඹේ හඩේ සොඳුරුතම මැතිරුම.

නුඹ වතේ ඇතිරුණු පිවිතුරුම ම සලකුණු! 

අඳුරේ රඳවා මා - හුදකලාවේ

ඇදෙන්නට ගත්තා මගේ දවස් අවුල වෙත.

විශ්වාසයක් හා ආනුප්‍රාණයක් නැතිව,

කඳුලක්, ප්‍රේමයක් මෙන් ජීවිතයක් ද නොමැතිව.

මගේ ආත්මය සේන්දු විය ප්‍රබෝධමත් මොහොතට;

ප්‍රාදූර්භූත විය නැවත නුඹ මගේ දෑස් අස

කෙටි හා ක්ෂණික පෙර නිමිත්තක් ලෙද

මන බඳින ආලෝකයේ සුපිරිසිදු මායාව.

මගේ හදවත දැන්, මෝහනයෙන් වෙළී

ස්පන්දනය වේ තදින්,  ඉපිළී යළිත්

නොවක් විශ්වාසයක් හා ඇතිව ආනුප්‍රාණයක්,

මුදු මොළොක් කඳුළු මෙන්ම ප්‍රේමය සමග ජීවිතය.

Translated by: Prasad Nirosha Bandara

අමතක කළෝතින් නුඹ මා [If You Forget Me ~ Pablo Neruda]

 

එකම දෙයක් ඔබට කියන්නයි

මට ඕන

ඔයා දන්නවා ඒ වග;

බැලුවොතින් හෙම මම

මන්දගාමී සරත් ඍතුවේ,මා ජනේලය අස

රක්තවන් ශාඛාවක වූ

පළිඟුවන් හඳ දෙස,

ස්පර්ශ කළොත් හෙම මා

ගිනි හුල අසළ

අතිශ්‍ය සිහින් අළු හෝ

සියුම්වට රැලිගැසුන ලී දඬු

ඒ හැම රැගෙන යයි මා ඔබ වෙත,

පවතින සියලු දේ මෙන්,

සුවඳ, ආලෝකය, ලෝහ

කුඩා බෝට්ටු විලස

යාත්‍රා කරනවා

මා එන මග ඇස් යොමා සිටින

ඔබේ දූපත් දෙසට.

ඔව් දැන්,

නවත්වනවානම් ඔයා පෙම් කරන එක ටිකෙන් ටික මට

නවත්වමි මම ද මගෙ ප්‍රේමය ද බිඳ බිඳ.

හදිසියේ, අමතක කළොත් හෙම ඔබ මා

නොසොයන්න යළි මා ගැන

මන්දයත්, මටත් ඔබ අමතකව ඇති එදින.

මගේ ජීවිතය හරහා හමා යන

විජිනිපත් සෙලවෙන හුළඟ,

දුරස් හා උමතුයැ‘යි හඟියිනම් හා

වෙරළත මත

හැර දමායන්නට මා

තීරණය කරයිනම් නුඹ,

සිහි තබාගනුමැන,

ඒ දිනේ

ඒ පැයේදීම

මා මුදාගත යුතුයි මගේ අත්

ඇදී යනු ඇත මගේ මුල්

වෙනත් භූමියක් සොයමින්

එනමුදු,

හැම දිනයකදීම

සෑම පැයකදිම

මා වෙනුවෙන්ම නිර්මිත බව හැඟේ නම් නුඹ

අසීමිත මිහිරියාවක් සමගින්,

කුසුමක් ඔබේ දෙතොලත

හඟීනම් සෑම දිනකම

නැගී විමසනු

මා ගැන.

අහා මගේ ප්‍රේමය,

මගේම වූ පෙම්වතිය

මා තුළ ඒ සියලු ගින්දර නැවත නැවතත් දැල්වේ

කිසිවක්ම නිවී හෝ අමතක වී නොමැතිය,

ඔබේ ඔය ප්‍රේමයෙන් සුපෝෂිත වේ මගේ ආලය

ප්‍රේමිය,

ඔබේ දිවි ඇති තුරා

එය ඔබේ සුරත මත

අත් නොහැර මගේ දෑත්

ඇත්තමයි රැඳෙනු ඇත.

Translated by: Prasad Nirosha Bandara

අද රාත්‍රියෙහි මට දුක්බරම වැකි ලියනට හැක [Tonight I Can Write The Saddest Lines ~ Pablo Neruda]

 

අද රාත්‍රියෙහි මට දුක්බරම වැකි ලියනට හැක.

ඔව්, උදාහරණයක් හැටියට, ‘රාත්‍රිය සුණු විසුණු වී ඇත.

සුනිල්වන් තරුකැට ඈත මායිමේ සසැලේ'

බ්‍රමණිත, රාත්‍රී සුළඟ අහස් ගැබ ගායනයක.

අද රාත්‍රියෙහි මට සෝබරම වැකි ලියනට හැක.

මම ඇයට පෙම් කළෙමි. සමහර විට ඈත් මට පෙම් කළා.

මේවන්ම රැයකදී ඈ හොවා ගතිමි මා අත

නිමක් නැති අහස යට යළි යළිදු සිපගතිමි.

ඇතැම් විට ඈ මවෙත පෙම් කළා, මම ඇයට පෙම් කළෙමි.

කෙලෙසනම් පෙම් නොකර සිටිමිද ඒ විසල් නිසල දෑසට?

අද රාත්‍රියෙහි මට දුක්බරම වැකි ලියනට හැක.

ඈ මට නොමැති බව සිතන්නට, ඈ මට අහිමිවී ඇති බව දැනෙන්නට.

 

ඈ නොමැතිවා වුවද තාමත්ම අතිමහත්, මේ විසල් රාත්‍රිය වෙත සවන් දෙන්නට.

තණබිමට පින්න සේ, දුක්බරම වැකි කඩා වැටෙනවා ආත්මෙට.

රඳවාගත නුහුනු වුව කම්නැත ඈ මගේ ප්‍රේමය මත.

රාත්‍රිය සුණු විසුණුය, ඈ නොමැත මා අස.

මෙපමණයි, කවුරුදෝ ගී ගයයි ඈතින් - දුරින්

ආත්මය නොපිළිගයි අහිමිවී ගිය බවක් ඈ. 

ඇවෙත දිව යන්න මෙන්, මා නුවන් ලුහුබඳියි

මගේ හද ඈ සොයයි, ඈ නොමැත මා අසළ.

ස්ථිරයි, මම තවත් ඇයට පෙම් නොකරමි, 

එසේ වුව මා ප්‍රේම කළ අයුරු?

ඇගෙ සවන් අතගාන පවනක් සොයා නිතර

හැම විටම මගේ හඬ නිරත විය වෑයමක.

තවත් කෙනෙකුගේ - ඔව් ඈ තවකෙකුගෙ වනු ඇත. පෙරදා මගේ හාදු මෙන්,

ඈ අහිමි රික්තකය, ඈ දීප්තිමත් සිරුර, අනන්ත ඇස්.

ස්ථිරයි, මම තවත් ඇයට පෙම් නොකරමි, ඒත් සමහරවිට මම ඇයට ආදරෙයි.

ප්‍රේමය බොහොමත්ම කෙටියි, අමතකවීම් දිග වැඩියි.

මන්ද යත්, මේ වන්ම රැයවල ඈ මා දෑත්යුග මත හොවාගෙන සිටි බැවිනි

මගෙ ආත්මය නොපිළිගයි අහිමිවී ගිය බවක් ඈ 

ඇය මට වේදනා දෙන අවසාන රිදවුම මෙය වුව ද

මේ මම ඇය වෙනුවෙන් ලියන අවසාන පද

[Translated by: Prasad Nirosha Bandara]

Painting - The Kiss (Gustav Klimt)

මත්වී පයින් තුරු වලින් [Drunk with Pines ~ Pablo Neruda]

මත්වී පයින් තුරු වලින් හා දිගු හාදු වලින්,

ගිම්හානය මෙන්, මෙහෙයවමි රෝසමල් වේගී රුවල්,

සිහින් දවසක නැමී මරණය දෙස,

මා උග්‍ර සමුදුරු උමතුවෙහි ඇලෙනෙමි.

මගේ හාමත් දියමත හබල්ලමි සුදුමැලිව,

නිරුවත් දේශගුණයේ ඇඹුල් සුවඳට මුසුව සරන්නෙමි ඔබ මොබ, 

තවමමත් අළුපැහැති තිත්ත ස්වරයන් සමග

අත් හළ දිය විසුරුමක සෝබරම මුද්‍රාව පැළඳගෙන.

ලලාසාවෙන් බරව, හුදකලා එකම රළ මත නැගෙමි,

සඳු හිරුද - උණුසුමත් සීතලත් එක් වරම පැන නැගුණු,

ඉමිහිරිය, ශ්වේතවන් ගැවසි සිහිල්ලැල් බඳෙ‘ව්

වාසනාවන්ත දිවයින් උගුර මත නිවෙමි

විදුලි ධාරා සමග ආරෝපිතව - උමතුවට

තෙතබරිත රැයේදී සලිතවේ මගේ හාදුමය සළුව,

වික්‍රමාන්විතම ලෙස බෙදී යන සිහින වල 

මත්ගැහුණු රෝස මල් රංගනයකය - ඒ මා මතම 

උඩුගං බලා ඇදෙන පිටත දිය රළ අතර

ඉක්මනින් හා සෙමෙන් නුබ කුසෙහි ශක්තියෙන්

ආත්මයෙ සදාතන බඳින ලද මසෙකු ලෙද

ඔබෙ සමාන්තර සිරුර යටත්වෙයි මගෙ දෑත් යුග අසල

Translated by: Prasad Nirosha Bandara

ආදරය (Love ~ Pablo Neruda)

සුපුෂ්පිත කුසුම් බර උයන්වල

හමා එන වසත් සුවඳවිලවුන්

වේදනා දෙවනවා

ඒ ඔබ නිසා මට

ඔබේ වත අමතකව ඇත.

ඔබේ ඔය දෑත් යුග 

තවදුරටත් මතකයේ නෑ මට,

මා ලවනත තැබූ ඔය දෙතොල හැඟුමන්?

උයන් බිම්වල නිදිකිරන

ශ්වේත පිළිරූ වෙත,

ඔව්, කිසිදාක හඬක් හා 

පෙනීමක් නැති

සුදු පිළිරූවලට පවා 

ආදරේ දැනෙනවා,

ඒ ඔබ නිසාවෙනි 

ඔබේ හඬ අමතකව ඇත.

ඔබේ කෙළිලොල් හඬ,

ඔබ දෑස් යුග පවා 

මගෙ මතකයෙන් ඔබ්බෙනි

යම් සේද සුවඳ කුසුමට, 

එනයින් ඇද බැඳ තබා ඇත මා 

නොපැහැදිලි ඔබේ මතකය.

තුවාල වේදනාවෙන් දිවි හරිනෙමි.

ස්පර්ෂ කළෝතින් හෙම ඔබ

යළි සුව නොවන වේදනා දෙනු ඇති.

ඔබේ ඔය පහස 

මා වටකරනවා නිරතුරු,

මලානික පහැ බිත්ති මත

එතී තරණය කරන වැල් මෙන්

ඔබෙ ආදරය අමතකයි මට.

එනමුදු සෑම බැල්මෙක

ඇස ගැහෙන හැම කවුලුවක් පාසා

ඇඳී ඇඳී පේන්නෙම 

ඔව් ඒ ඔබේ රුවමයි 

මත්කරන ගිම්හාන විලවුන් 

වේදනා දෙවනවා 

ඒ ඔබ නිසාවෙන්මය. 

එහෙත් යළි ලුහුබඳින්නෙමි,

ආසාවන් අවුස්සන ක්ෂණික සංඥා, 

උල්කාපාත - පතිතවන වස්තූන්..


Love ~ Pablo Neruda [Translated by: Prasad Nirosha Bandara]