ඇඩ්මන්ටයින් දම්වැල් හීතලෙන් ගැහෙනවා
නුඹ නැති දුකට ප්‍රොමිතියස්
දම්වැල් වලට විතරමද දැනෙන්නේ මේ දුක
ගිරි බෙයද අස හැඬු කිඳුරියන්වත් කොයිබද?
අසනි සර අවි සමඟ රිසිසේ කෙළින මහ දෙවි
අන්තේවාසික හර්මීස්
බලය හා භීෂණය
ඛෙදා දෙනවා ප්‍රොමිතියස්
යෙහෙන් දිගහැර අත මිට
මිනිස් වග හට සෙත් පිණිස
දෙව් ලොවින් සඟවා - සොරාගෙන
එදා නුඹ දුන් මහාර්ඝ වස්තුව
''ගින්දර!''
ගසා කනවා ලිහිණියන් - කඩ කඩා පපු කැවුතුම
මුදුන්පත් හිරු යට නොව
හීගඬු පිපෙන අඳුරෙද
ලෝකාන්තයේ තනිවුණ
මේ ගිරි දුදුල පාමුල
රිදුම් දෙනවා හදවත
විනිවිදින බිය දැවටුණ - ඝනඳුරම පමණකි එද
නුඹ නැති නිසා ප්‍රොමිතියස්
දම්වැල් වලට විතරමද දැනෙන්නේ මේ දුක
නුඹෙ දුකට හැඬු කිඳුරියන්වත් කොයිබද?
බොත් උරා සාරය - සිදුරු කර ඇට මැස්සන්
මුළු සමාජයේ දේහය
කියන්නේ කවුද ප්‍රොමිතියස්
මහ දෙවිඳු ගිජු නෙතට හසු වුණ
මහ දෙවි බිසව - හේරා
රෝෂයෙන් උදස් කළ
අයෝ - ආගෝස්හි රූබර කුමරිය
වෙත එදා ඔබ කියු
රුදු අනාවෙක අන වින
හිටියනම් අද දින - මහ කිවිඳු ඊස්කිලස්වත්
ලියනවා සත්තයි
ප්‍රොමිතියස් බන්ධනය නොව
මහ දෙවි චින්තනය පිළිබඳ
මේ මහා නාටකය අලුතින්
දම්වැල් වලට විතරමද දැනෙන්නේ මේ වෙනස
නුඹෙ දුකට හැඬු කිඳුරියන්වත් කොයිබද?
දුටුවෙද නොඑන පිරිපත
නුඹ නික්මෙන්න පෙර යම
කාලවන් දරුවෙක් - දුන්නක් අතින් ගත් කුමරෙක්
මාන්නා හීසර විද
බිම ලන්න ගිජු ලිහිණින්
ගලවාගන්න ලෝකය
මේ හැකිලි ලූ යදමින්
පරම්පරා දහ තුනකින්වත්
ප්‍රොමිතියස් - වෙන්නට පෙර දකින්නා
දම්වැල් වලට විතරමද දැනෙන්නේ මේ වෙනස
ගිරි බෙයද අස හැඬු කිඳුරියන්වත් කොයිබද?
- ප්‍රසාද් නිරෝෂ බණ්ඩාර
No comments:
Post a Comment